مــــنتــــديـــــــــــــــــــات البصـــــــــــــــــــــــــــــــرة الاســــــــــــــلامية
اهلا وسهلا بالزائر الكريم ارجو ان تستفاد من المنتدى ويشرفنا انظمامك معنا
مــــنتــــديـــــــــــــــــــات البصـــــــــــــــــــــــــــــــرة الاســــــــــــــلامية
اهلا وسهلا بالزائر الكريم ارجو ان تستفاد من المنتدى ويشرفنا انظمامك معنا
مــــنتــــديـــــــــــــــــــات البصـــــــــــــــــــــــــــــــرة الاســــــــــــــلامية
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

مــــنتــــديـــــــــــــــــــات البصـــــــــــــــــــــــــــــــرة الاســــــــــــــلامية


 
الرئيسيةالبوابةأحدث الصورالتسجيلدخول
اهلا وسهلا بكم في منتدى ابن البصرة((((( يسعدنا تواجدكم معنا ))))) ويشرفنا((((( انظمامكم))))) في منتدانا
&&&&&&& شاهد واستمتع مع جديد منتدى ابن البصرة&&&&&&&&&
ابن البصرة
منتديات ابن البصرة برحب بكم
اللهم كن لوليك الحجة ابن الحسن صلواتك عليه وعلى اباءه في هذه الساعة وفي كل ساعة وليا وحافظا وناصرا وقائدا ودليلا وعينا حتى تسكنه ارضك طوعا وتمتعه فيها طويلا برحمتك يا ارحم الراحمين
الإنسان الناجح هو الذى يغلق فمه قبل أن يغلق الناس آذانهم ويفتح أذنيه قبل أن يفتح الناس أفواههم
إذا كان لديك رغيفان فـكُل أحدهما وتصدق بالأخر
لا تدع لسانك يشارك عينيك عند انتقاد عيوب الآخرين فلا تنس انهم مثلك لهم عيون والسن.
إذا استشارك عدوك فقدم له النصيحة ، لأنه بالاستشارة قد خرج من معاداتك إلى موالاتك
من وثق بالله أغناه ومن توكل عليه كفاه ومن خافه قلت مخافته ومن عرفه تمت معرفته
حسن الخلق يستر كثيراً من السيئات كما أن سوء الخلق يغطى كثيراً من الحسنات
دعاء الزهراء على من ظلمها اللهم إليك نشكوا فقد نبيك ورسولك وصفيك وارتداد أمته ، ومنعهم إيانا حقنا الذي جعلته لنا في كتابك المنزل علي نبيك بلسانه
بِسْمِ اللّهِ الرَّحْمَنِ الرَّحِيمِ الْحَمْدُ للّهِ رَبِّ الْعَالَمِينَ الرَّحْمنِ الرَّحِيمِ مَالِكِ يَوْمِ الدِّينِ إِيَّاكَ نَعْبُدُ وإِيَّاكَ نَسْتَعِينُ اهدِنَا الصِّرَاطَ المُستَقِيمَ صِرَاطَ الَّذِينَ أَنعَمتَ عَلَيهِمْ غَيرِ المَغضُوبِ عَلَيهِمْ وَلاَ الضَّالِّينَ صدق الله العلي العظيم
سبحان الله والحمد لله ولا اله الا الله والله اكبر سبحان الله والحمد لله ولا اله الا الله والله اكبر سبحان الله والحمد لله ولا اله الا الله والله اكبر

إرسال موضوع جديد   إرسال مساهمة في موضوع
 

 دارميات عراقيه بحته

اذهب الى الأسفل 
كاتب الموضوعرسالة


avatar


نقاط : 0
تاريخ التسجيل : 01/01/1970

دارميات عراقيه بحته  Empty
مُساهمةموضوع: دارميات عراقيه بحته    دارميات عراقيه بحته  Emptyالسبت 02 يونيو 2012, 4:11 am

1. دارميات عراقيه بحته
جبتلكم دارميات عراقيه كلش حلوه ياريت تعجبكم


شحجي وتريد الناس من عندي أحجـي
دمعتي إبطرف العين بس أحجي أبجـي








أرد انشدك وارجوك صارحني يهواي
تذكرني لوغصيت من تشرب المــاي ؟








هاك أبرَه . , هاك الخيط خويـه أرد أكلفـَـــــــــك
أمسرٌد الدلال شِــلـٌــــه إعلى عِرفَـــــــــــك





هـاك أبرتك. .و الخيـط خويــه إمش عنــــــٌي
لو بـيـــٌه أشل إجروح .. جان أشل ذَنـٌــــــــي





جرح الفـــراك إيهون عن جرح الــــوداع
البيه دليلي إنصــاب يتطشـٌر أربـــــاع





زين وتشوفه الناس دلاٌلـك أربـــــــــاع
دلاٌلي من فركــاه مثل الثلج مـــــــــاع





لاتســأل إعله الحال خلـٌيها سكتــــــــــــــــــــه
تسأل على المكتول والكاتل إنتـــــــــــــــــــــه






يسألني البطران إعربلي كــــــــــــانَ
حسباله مثل العام عقلي إبمكانـــــــــــه








هاك استكانة جاي أشرب عوافــي
أو دزيته لك مخصوص يامايه صافي







وحدي ابنص الليل بس حيرتي أوياي
أبجي أعلى وقت الراح واتنطر الجاي







للخوه ماقضيت شي ماقضيته
حتى الصخر ياناس وتوسديته







انت العطش والماي وانت المشوفـه
ورسمك وحق عيناك بالكاس اشوفه









أوصل إل حي إهواي لو تشبج إرماح
والمعتني الطيبات مو فشله لوطاح






الدنيا للتهواه تركَص إمفرعة
وآنه تجيني إبموس وتكَلي إبلعه





إنهجم بيت العين هالكَد وكيحة
كل ما يمر إحليو إتكَلي صيحه





حقي من أحامي إعليج ياشجرة التين
ماي الربيتي عليه من دمعة العين










رش الدرب تيــزاب حافي أعتـني لـَــــــــك
جا شٌـلي بالرجليـن الما تجي لــــــــــــك





لو ترِش مو تيــزاب لو تزرع ألغــــــــــام
اللحم خلـٌه إيروح أوصلــــٌك إعظــــــــام








الدنيا بس وياي شـَدت عداوه
ولا واحد إمن الناس لجروحي داوه






الدنيا للتِـــهواه تفتحلـَـه الأبواب
ينزاح حتـٌى الكَيـظ ويصيــر خنياب







الدنيا للتهواه تركَصله جــوبي
وآنه الفكَر يا ناس شكَــٌالي ثوبي







حسـرَه إلكْ بالدَلال ظـلـٌتْ لما أمـــــــــوتْ
ماتدري حقها الناس إصوابي بسكـــــــــــوتْ





كَـالولي ولفك راح كَلتلهم أبعـَد
كَـالو صعــَد للغيــم كَلتلهم أصعــَد






عفيه كَلب مَيليــن من يسمع إبجــاي
لو من صخر هم جــان لان وغده مــاي









عقرب تريد تصير تلدغني وتروح


حسبالي خوش وليد سلمتك الروح











لاتهتم على الراح ويهمك الراح
والعالي مو بالطول بالصبر ينلاح






يسألني البطران حالك إشلونــه
الغاضب الله إعليه هم ينشدوونـه !!






عبالي طيب زاد واعطيتك اعيون
تالي توج النار ويا اليكرهـــون








علمني عالنسيان ارد انسى ضيمـــــك
وي غيري قمره اتصير بس حصتي ضيمك









رحت آنــه للدكتـور حاجاني بسكـــــــــوت
لو ولفـًـــك إيداويــــك لو باجر إتمـــــــوت





روحي إبسريـــر الموت تنشدني عنـٌــــــك
وتكًًـــلي ليش إهـــواك متبري منــــــٌـك








همــٌكْ .. وهَم الناس .. وهَم همْ الأيــــــــــــام
وفوكًًـــــاها هم العين ماتقبل إتنــــــــــام






همٌك وهم الناس وهم الله فـــــــــــــوكًًـه
صاحت عليــٌه الناس جن عندي بوكًًـــــــــــه






متعجـٌب المهمــوم يشرب جكًًــــــــــــــاره
كًًلبي بكثر ما نــــوح تجويـــــــــــني ناره






همٌــــك .. وهم الناس وهم هم الهمــــــــــوم
لو وحده منهن بيــــك ماتكًًدر إتكًًــــــــــوم






نذرك ياسيد دخيـــل نوط أبو الميـــــــــــــــه
من أفز والكًًه إهــــــــــواي غافي إعله إديـــــُه






الدهر بس وياي راكب إحصانــــــــــــــــه
ويكًًــــلي وين إتروح جدٌامـــك آنــــــــــه





الدهر بس وياي جزٌاهـــا الحـــــــــــدود
بالدين أوفي الدين واتديــــــــٌــــن إردوود





كًًــلبي أرد أكًًــصٌــه إبموس وأكوي إبمكانــــــــه
علٌمني إعله درووب كلهن مهـــــــــــــــــــانه






كًًــلبي أرد أكًًـصٌه إبموس وبفاس أكًًطعه
خلُصها بالسختــات مالحَك ربعــــــــه





شامت وكًًف عل الباب حاير شــــــــكًًـلٌـه
أرتجي إعله المكســــور لو دمعي إهلـٌــــــــه





إرتجي إعله المكســــور حيل إردس الكًًاع
بالك تذل جدام شمٌاتك إبســــــــــاع






شمٌـاتي مو شٌـمات شمٌـاتي شمٌــــــــــــات
بالكًًبر ويسألــون حي بعده لو مـــــــــــــات






شِمـٌاتي مو شِمــٌات شماتي شرطـــــــــــــه
بالكًًبر ويكًًولـــــون طلعه أرد أكًًرطـــــــــه







شمٌـاتي مو شمــات شمــاتي إخــــــــوتي
حتى أمي يا هالناس تدعي إعله موتـــــــــــي






شمٌـاتي مو شِمٌـــات شماتي تســــــــعه
والعاشر إزغيرون يأشر بإصبعــــــــــــه






وينه اليصل لهواي يشكيله حـــــــــــــالي
أوجرن حيل وياي ذنـٌي الليــــــــــــــالي







هم شفت بيت أنذال ربـٌـاله حُـره
جا كًًــلنه بالتبليط تطلع إفطـٌــــرٌه






الميت إشمدريــــه باليمشي جنـٌــــــــاز
لكن طبعها الروح تربي إعله الإعــــــــــزاز






خلـٌـيتك إبسرداب فوكًًـــــه متر صَـبْ
صبٌـح الواشي وياك من ياكتر طـَــــــبْ






من قِِسـت حلك إهواي المحبس أصغـــــــــر
خافن يغص بالماي يالكاظم إستـــــــــــــر






سَـلٌـمْ ولَو بالعين تكفي الإشـــــــــاره
روحي إبتلت بهواك .. سـَـوٌيلي جــــــــاره






وينه اليخَيـطْ العين ويفكني منهـــــــــــا
كل ما تصد للدار يكثر حزنــــــــــــها






شفت الضوه إمن إبعـيد كًًلت إحتركًًنـــــه
لمٌـن وصلت البيت لن ولفي عدنـــــــــه





متعني للعباس اشكي الهضايم والواشي قبلي بيوم بلحضره نايم


ابجي واصيح بصوت يابن علي دخيل لو تجمع الراسين لو عنك انشيل


اصفن واعد انجوم ويدي على خدي هم غربه هم فراق هم ولفي ضدي



عمد أرد أمر عالدار وشبع مَغَمة
وبجي بجي المفطوم من يذكر أمه

...

الطول طول اهواي والمكفة مكفاه
بالبصرة عفت اهواي أشوصله هنا

...

شماتي ألفين ومضاعف إعداي
أبقَ أبعزم دوم بس كونك أوياي

هم انا مثل الناس هم عندي بطه
راحت تغط بالشط والغطه غطه


كون التريده الروح ترجية بذني
ون كمت ون كعديت بالخد يحبني


شمعه بوسط نيران يالشفت قلبي
من كثر همي عليك تيهت دربي
0000000000000000000000
من غربتي ياناس اصرخ واصيحن
كثر الهموم اهواي اوقف واطيحن
0000000000000000000000
ياابو الفضل حياك جيتك انادي
دمعي دمع همال والقلب حادي
0000000000000000000000
امشي بدرب مسدود امشي واتعثر
اتوجه بالحيطان وقلبي يتحسر
000000000000000000
كون انكلب فنجان بيد الكهوجي ....
ووصل لحلك اهواي وانتحب وابجي .
000000000000000000
شلونك شلون الدار شلون الدجاجات
هم منهن تذبحون للعدكم يبات

اهلا وسهلا بيك يالعدنه تبات
لشخصك اذبح ديج والباجي بيضات



شلونـــــــك.. شلون الدار .. وشلون الأحبــــــاب
أذكر جرح بجلاك خبـٌــرني ما طـــــــــــــــــاب
- - -
زين آنه . . زينه الدار . . زينه الدجاجـــات
نذبح أركًــــاب أزلام للعدنـــه إيبـــــــــات *39*
- - -
شلونـــك .. شلون الدار .. وشلون الفروخ
لبسو إهدوم العيــد !! لو لِســـــه صلوخ
- - -
صيـٌحت حيــل وحيــــل باليمنه وأوميــــت
ياهو الكًًــــلتله إدخيـــل ظم روحه بالبيـــــــت
- - -
إنته يظل بالبيت الردتـــه فــــــــــــــزاع
آنه الكًًــلتله إدخيـــــل ظم روحـــه بالكًًـــــاع
- - -
متعني للعبـــاس أبجي إبحظرتـــــــــــــــه
والينكســر بهواه شنهو جبرتــــــــــــــــــه
- - -
مانمت طــول اللـــيل حلف المخـــــــــــدٌه
الدمع صــاير سيــل للركبه حـــــــــــــدٌه
- - -
آنه من أحب إشفاك كل ساكني إيهـــــــــيج
يبقه الطعم ويٌــاي وي بلعة الريـــــــــج
- - -
خـلـٌـي إييدج إعله إثنيــن بنتي الطمع زيــــــن
والثالث إحجي ويــــاه بالج تخســــــــــــرين
- - -
ظَل إبجي بالكارووك أبداً مهِــــــــــــــــزَك
لو إنك إبن إهواي جــان إشمعـــــــــــزٌك
- - -
حبله وأهز كارووك وتسعـــــه اليلعبون
كلهم فِده لهواي لو مر يروحــــــــــون
- - -
حبله وأهز كارووك وتسعه المِـسلحيــــــــــن
مال العمى يا عيـن عالدرب تربيـــــــــــــن
- - -
من جبتو طاري إهــواي تيـٌهتْ شــــوري
خـدٌرت بالفانوس حسبالي قـــــــــوري
- - -
سود العيـون إكبـار والحـَـلِـك محبــــــس
ويسترها رب الكون من دلع تلبــــــــــــس
- - -
هم حلو .. وهم إزغيــر .. هم أزرك عيـــــون
بس بيه طبع مو زين من يوعد إيخـــــــــــون
- - -
سبحانه من سـوٌاك نص وجهك إعيـــــــــــون
إزغيــٌر سبيــت الناس من تكبر شلــــــــــون
- - -
كل السـنون إعظـــام بس سِــنـٌه ليلــــــــو
جاكم وســيع العين عن دربه ميــــــــــــــلو
- - -
كل السِـنون إعظــام بس سِنـٌـه فضـٌــــــــــــه
زبد ويموع إهواي ومنيـــــــن أكضـٌــــــــــــه
- - -
بالـَك تمر بالدار عنها إشمر إبعيـــــــــــــد
دار العزيز هواي نوح وبجي إتريــــــــــــد
- - -
عمداً أمرْ بالدار والنـوح أزيـــــــــــــده
وأسمع صداهـــا إيكًـــــــول راح التريــــده
- - -
حِـط باللبن تيــزاب مجبـور أشربـــــــــــه
بس لا أشوفك يوم تمشي وي غربـــــــــــــــه
- - -
لالاتذكر الروح خليهَ وسكت
أشتضن بالتبليط الشجرة تنبت


أزرع صبر ياناس وحصد نوايب
آنة لغيوم أوياي تمطر مصايب
- - -
للموت أظل وياك ميهمني همي
إنت النضر للعين وبشرياني دمي
- - -
تتمنه ألك كَلبين غَمك يهلراي
نص كَلب عندي اعليل ونطيته لهواي
- - -
خل تشمت الشمات بالغفلة ينزل
الدمع عل وجنات صايرله منزل
- - -
للحِمل كَوة أنشيل غصبن علَ الروح
الكَلب صار أرماد مايحمل أجروح
- - -
كفت ونين الروح كَامت تذب دم
تشرب قهر مدكَوك ومنكَع أبسَم
- - -
ليش القهر والضيم عدكم هواية
آنة المحبة وياي تسري أبدماية



أنهض ورد للكَاع وتوجه ونهض
ماخَله عظم اصحيح رضني الدهر رض
- - -
من تبعد أسكر بيك أو من تكَرب أصحه
أو ماصخ يظل كل زاد بس إنت ملحه
- - -
لاتنشد أعلَ الحال خَلهَ غشيمه
هم شفت هم سمعيت فرحة يتيمة
- - -
أهلاً وسهلاً بيك ياسبب موتي
عفت العشيرة عليك أوأمي او أخوتي
- - -
ضلمة أو درب عاثور وَي عوية الذيب
كل هاذه وتعناك بيك أذكر الطيب
- - -
عيونك قواعد سام ترمي قنابل
من تعبر العشرين تكتل يجاهل


أشرب واريــد أنســاك واسكر واذكــرك
مو بالعظم ويطيــب بالكًلب كســــــرك

&&&&
خَـلْ روحَـــكْ إبعِـز دوم بالك تذلهــــا
ولا تطلب الحاجــات إلاٌ من أهلهـــــــــــــا

&&&&&
غصبن عليـٌه الروح آنـه الأذلهـــــــــــــا
محتـــــــــاج والحاجات ماهُـمٌـه أهلهـــــــا

الدهر لو وازاك هم إنتَ وازه
سل سيفك أبيمناك وطلب برازه

الثاني يجيب
الدهر لو وازاك إتوازه وياه
لو ميت أوخلصان لو مصطفي أوياه


صب دمعي على الكاع واحرك دغلهه
والبصره والعشار هيه ونخلهـــــــــا


ارد اسئل العشاق من مثلي مشتاق
بحضني غافي اهواي وابجي من الفراق


بطل وربع جريت كل قصدي انساك
وتاليهه باخر بيك بالمزة الكـــــاك



جا وشحلات الجا جا لعدك انتـــــــه
جا الحجي بلا جا جا شنهي لذتــــه



متعجب بدنياك دمعك سمج بيـــــــــه
دمعي يفيض اشطوط حوت الغرق بيه


يسألني البطران ليش وجهك اصفر
مايدري عا المحبوب قلبي تفطــــر



يسألني البطران ليش راسك اكرع
مايدري عا الحلوين شعري تشلع


يسألني البطران تشرب عرق ليش
هم سكم هم فراق هم لوعة الجيش



سباحه لك بالروح خضرى أوطريه
تسقيها من تشتاق وتمر علــــيه

همي الليالي اتعود واتعاتب أوياك
احجايه للشمات خلاني فرقــاك

لو غبت عن الروح احسبها شده
واحرق ابدمع العين حتى المخده


القلب قال أحاه ! قتله وجعــــــــــتين
منهو الاجى أوعزاك من طقك البين

حسره وحدرها احاه وبقلبي لــوعه
كلما اضوق الزاد اركض وازوعه

حظي ركب صاروخ وتناوش الباب
لمن كلتله اليوم انت أوفة من الأحباب










أطلـَـك وأعت بالكًـــــاع مثل المعســــــره
حسبالي عشـر إفروخ تاليــها حســــــــــره

ثاري البنات اشكال مثل الجفافـي
وحده التظل للغير أواحده التوافي

غصبن عليـه الروح آنـه الأذلهـا
محتاج والحاجات ماهـمـه أهلهـا

لانفع نصحي أوياك لانفع لــــومي
أنا ادري مامحضوض راح ابقى دومي

لاواشي لانمام يبعدني عــنك
بس النجف يهواي ياخذني منك

تيزاب أحط بالعين واعميها بجـــفاك

كل مرض لامابيك ياخويا محسود
اوحق اليحسدك داخ بعيونك السود


مر والمراره البيك محد حواهـــا
أو روحي اشتهت ملقاك عفيه اشقواها


بطلت ممشى الحيل قمت أمشي تاته
أومثل اليقودن بيه أمه أو خـواتـه

لو ممشى عشر اسنين أمشيها واكثر
ماأتعب وما جوز من حب الأسمـر



انشاءالله تعجبكم الدارميات>>

الرجوع الى أعلى الصفحة اذهب الى الأسفل
 
دارميات عراقيه بحته
الرجوع الى أعلى الصفحة 
صفحة 1 من اصل 1

صلاحيات هذا المنتدى:تستطيع الرد على المواضيع في هذا المنتدى
مــــنتــــديـــــــــــــــــــات البصـــــــــــــــــــــــــــــــرة الاســــــــــــــلامية :: قسم المسجات-
إرسال موضوع جديد   إرسال مساهمة في موضوعانتقل الى: